لیکوال:محمدناصرحلیمي
عمر بن خطاب رضي الله عنه وايي: پر بار وړونکې تجارتي سپرلۍ مرګ راته تر دې چې د مجاهد په
توګه د الله تعالی په لار کې شهید شم، ځکه ډېر غوره دی، چې الله تعالی رښتیني
تاجران تر مجاهدینو مخکې ذکر کړي دي: «وَآخَرُونَ يضْربُونَ فِي الأَرْض».[1] (يوه ډله مؤمنان تجارتي سفرونه لري).تجارت
ذهني ستوماني، جسمي ستړیا او رواني لالهاندۍ لري. د رښتیني
سوداګر هر دم او قدم عبادت دی، تجارت ته د هڅوونکو آيتونو او نبوي احاديثو ته شا
اړول، زموږ د بدمرغيو بله اساسي سرچينه ده.
سفيان الثوري رحمه الله د خپلې زمانې د سياستوالو کرغېړن
چلن ته ځير دى، په دې هم پوه و، چې ديني عالمان که د خپلو اقتصادي ستونزو د حل
لپاره کار ونه کړي، د سياستوالو دستمال يا څپوڼى به ترې جوړېږي، چې خپل چټل لاسونه
ورباندې پاکوي. دیني علماءو ته زما وړاندیز دادی چې خپله کار بار وکړي، چې سیاستوالو ته اړ
نشي چې بیا حقتلفو ته حق نشي ویلای، الله تعالی دې پر هېڅ دیني عالم داسې حالت نه
راولي چې د اقتصادي اړتیا له امله په فساد کې ښکېل او په رشوت کې اخته چارواکی د یوې
جملې هومره وستايي او یا یې دروازې ته ودرېږي.
(سفيان
الثوري رحمه الله به خپلې اشرفۍ (دينار) به په لاس کې اړول را اړول او ويل به يې، که
دا راسره نه واى ؛ نو عباسيانو رانه ځان پاک (لاس پاک) جوړاوه او خپلې خيرې يې
راباندې پاکولې).[2]
کله چې عمر بن خطاب غوندې ستر انسان ته تجارت دومره
ارزښت لري چې به دې لار کې شهادت ورته تر نورو ستر شهادت ښکاري، د هغه کرنیز مجاهد
او شهید اجر به څومره وي، چې په سلګونو باغونه د ولس د خیر ښېګڼې لپاره جوړوي؟ د
اوبو د مهارولو د مجاهد درجه به څومره لوړه وي چې اوبه مهاروي، سپېرې دښتې ابادوي،
انسان، حیوان او نبات ته نوی ژوند بښي او پرځان یې بسیا کوي؟ همداسې د ژوندانه نور
هغه ډګرونه چې پرمختګ یې انسان د انسان له اسارته او ذلته ژغوري.
رسول الله صلی الله علیه وسلم چې د جهاد درنښت او ثمر
وساتلای شو لامل یې دا و چې فوري اقتصادي، سیاسي، اداري، زراعتي، تجارتي، ښوونیز، روزنیز
او صنعتي جهادونو ته يې مخه هواره کړه.
ځکه د جهاد پت او ثمر په شعرونو، شعارونو، ناندرېمارو
بحثونو، محبسونو او لافو نه ساتل کېږي، په اقتصادي، تجارتي، زراعتي او صنعتي
پرمختیاوو سره ساتل کېږي.
د روسیانو پر خلاف د افغانانو د سترې سرښندنې ثمر چې زهر
شو لامل يې په پورته ډګرونو کې د وړو قیادتونو او تطبیقي طرحو نشتون و.
[1]. أبو عبد الله محمد بن
الحسن بن فرقد الشيباني ، الکسب ، ص ۴۴.
[2]. ملاعلي قاري نور الدين
ابوالحسن علي بن سلطان محمد المصابيح ، الهروي المکي ، مرقاة المفاتيح شرح مشکاة
المصابیح.
No comments:
Post a Comment