۴- قارئ القرآن

 لیکوال:محمدناصر حلیمي

۴- قارئ القرآن

قرأت یواځې د الفاظو لوستلو او یادولو یا په مسلکي ژبه حدر، ترتیل او مشق ته نه وايي، د قرآن کریم د قرات تعریف ابن قیم رحمه الله داسې کوي: « الْمَقْصُودُ مِنَ الْقِرَاءَةِ فَهْمُهُ وَتَدَبُّرُهُ، وَالْفِقْهُ فِيهِ وَالْعَمَلُ بِهِ، وَتِلَاوَتُهُ وَحِفْظُهُ وَسِيلَةٌ إِلَى مَعَانِيهِ ». ^[1]

( د قرآن د لوستلو معنا پر قرآن پوهېدل، په قرآن کې ژوره کتنه کول، د قرآن عملي کول دي، تلاوت او حفظ يې د معنا د زده کړې وسائل دي).

پخوانیو قرآنپوهانو سره دا خبره مشهوره وه چې: « نَزَلَ الْقُرْآنُ لِيُعْمَلَ بِهِ، فَاتَّخَذُوا تِلَاوَتَهُ عَمَلًا». ^[2] (قرآن د عمل لپاره راغی، دوی د قرآن تلاوت ته عمل وويل).

هغه پوهان چې پخپل علم، عمل نه کوي، حافظ د دوی په اړه داسې وايي:

واعظان که این جلوه در محراب ممبر میکنند	چون به خلوت میروند ان کار دیګر میکنند
مشکلی دارم ز دانشمند مجلس باز پرس	توبه فرمایان چرا خود توبه کمتر میکنند

 حافظ کره تشخیص او د شکایت تحلیل دا دی چې موږ داسې مدرسې او واعظان هم لرو چې د اسلام د دین بڼ پخپلو وینو، خولو او اوښکو خړوبوي او تاندوي، داسې عالمان لرو چې پوهه یې پر ګروهه او ګروهه یې پر پوهه ځواکمنه ده، مال، ژوند او وړتیا يې د نورو انسانانو په پاللو او روزلو کې د الله د رضا د حصول لپاره بوخت دي، البته له نیمګړو نصابونو او نیمګړو پوهانو شاګردان هم نیمګړي وي. که غواړو چې د پورته تشخیص شوي رنځ درملنه وکړو د ښوونځیو او پوهنځیو کادري او کاري تشکیل، نصاب او روزنیز سیستم باید د کمال او جمال هسکې مرحلې ته ورسوو.

---

[1]. ابن قيم الجوزية محمد بن أبي بكر بن أيوب بن سعد شمس الدين زاد المعاد في هدي خير العباد ، ج 1 ، ص 327.

[2]. ابن قيم الجوزية محمد بن أبي بكر بن أيوب بن سعد شمس الدين زاد المعاد في هدي خير العباد ج 1 ص 327.