لیکوال:محمدناصرحلیمي
د پورته خبرو لا وضاحت
موږ وايو: په زمکه کې د وچو او تازه مېوو، غلو او دانو
راټوکېدل، د الله تعالی د قدرتونو نښې دي، چې انسان بايد د الله تعالی عظمت ته د ذهنی قناعت له مخې د
عمل په ډګر کې تسليم شي، مګر د
شړو دښتو ترڅنګ د څپاندو سيندونو د بهیدلو او د قرآن کریم پر لارښوونو د باور
درلودو له ادعا سره سره د نړۍ په ګوټ ګوټ کې بشريت وچې شونډې او پرهر پرهر زړونه
په اقتصادي ستونزو کې نارينه ځپل کېږي، ښځمنې کړېږي او ماشومان ځورېږي، د اقتصادي ناورين له امله پوهان کله د لویدیځ
او کله دختیځ لمنو ته ځان غورځوي، د مهمو انساني مسائلو تعليل او تحليل په اجيرانه توګه او
نامردانه بڼه د انساني مصالحو د ګټو پر
خلاف ترسره کوي د راتلونکي صادقانه انځور، دقیق تحلیل او عالمانه څېړنه پکې له هر
ليکوال او قلموال څخه ورکه شوې ده، د ډېرو
قلموالو او خوله ورو په ليکنو، شننو او ویناوو کې فکري استقلال، رواني ثبات او
عقلي نوښت نشې محسوسولاى!
د زر او زور د چل او ټګۍ اتلان پيدا شي، دښتې
لاندې کړي او سيندونه د کورونو ړنګولو ته ياغي پرېږدي او د الله تعالی بنده ګان
خوار، زار، ذليل او زبون کړي ؛ خو په پوهانو، ليکوالو، خولورو او مخورو کې بيا دا نشي موندل کېدای پېغمبران، مصلحين او نېکان چې عادلانه واکمن حکومت يې د دين يوه څانګه ګڼلې، د الهي
حکمونو ذريعه
يې بللې، بې نظمۍ، بې کفايتۍ، ظلمونو او محروميتونو ته يې ديني او عقلي حللارې
لټولي او باکفايته سپېڅلي تشکيل يې ورته روزلی او ټاکلي دي، د تاريخ په اوږدو کې صالحانو له ديني لارښوونو څخه زرينې پردې د بې کفايته
سياسي مشرانو او شړېدليو سياسي سيستمونو لپاره نه دي جوړ کړي.
که د صالح لباسه خلکو
وضع همداسې وی مارکس
پخپلو دردمندو الفاظو د الحاد په غېږ کې خلکو ته د کور، کالي، ډوډۍ ورکولو ادعا
وکړي، عامو خلکو د وحې په حاملينو کې دا بې کفايتي په ملموس شکل کلونه کلونه
ازمېیلې وي، چې د دوى د «کور، کالي او ډوډۍ». مشکل نشي حلولاى.
د غاصبانو پر وړاندې يې د دوی زنګون کېژد حالت يې ليدلی او ازمېیلې وي او دا هم په رڼو سترګو
ګوري چې د نړۍ نور پوهان عملاً خپلو ولسونو ته له اقتصادي بحران او سياسي بې ثباتۍ
نه نجات ورکوي او دوی يې په الفاظو، تشو تپاکو قانع کوي او دروغجن تسکین وربښي.
عامو خلکو د زرګونو جريبو زمکو د غاصب ؛ د زرګونو
انسانانو د بې کوره کولو له مجرم سره د يوې نومرې او يا څو نومرو په بدل کې د دين
د لفظي مدافع[1] پخلاېنه او ټينګه رابطه يې ليدلې وي خلک خپله
اړ کېږي، چې د الحاد په ځلېدونکي او غولوونکي سراب کې د کور، کالي او ډوډۍ د ګټلو
په موخه خپل هغه په کتابونو کې بند حقيقي او سعادت بښونکى دين پرېږدي، چې که څه هم
پکې د ټول بشريت د ژغورنې او پرمختيا اصول، حقائق او تګلارې نغښتي دي او د غصب، انحصار[2] او استعمار سستم غوړونکي او پلويان پکې په رڼو الفاظو غندل
شوي دي.
دا په داسې حال کې، چې قرآن کریم بشري ستونزې له خالق سره د
معقول او رښتني تړاو، عاطفي سپېڅلتيا، عقلي پراختيا او عملي ځواکمنتيا له لارې پلي
کېدل غواړي، چې متأسفانه موږ ترې تر ډېره بريده بې برخې يو.
ډېر پرمختللي رواني، جسمي او عقلي رنځونه چې موږ ته نا
علاجه ښکاري، نورو خلکو همدغو نښو کې د دقيقې کتنې او ځیرنې په نتيجه کې د علاج
حيرانوونکي اسانه سيستمونه وړاندې کړل. "خير
امت"له دومره لوى خير څخه چې کومو خلکو پخپلو خامو نظرياتو او ناروا لاسوهنو
شاته پاتې کړل. دوی به خبير، بصیر او متعال الله ته څه ځواب وایي؟
حیرانوونکې
خو دا ده، چې هم"خیر امت"دی او هم يې نړۍ ته خیر تت برېښي. لامل يې د
قرآن کریم له تطبیق څخه د اوږې سپکول او تشول دي.
[1]. ددين عملي مدافعان دا
کار نه کوي ، خبره چې ورانه کړې ، ددين لفظي مدافعانو ورانه کړې.
[2]. تجارتي سیستمونه پخپل
واک کې راوستل او پر نورو خلکو کاري زمکه تنګول ، د لویو تاجرانو له لارې پر
منځنیو او وړو تاجرانو د تجارت مخه تړل.
No comments:
Post a Comment