مسلمانان ولې کار ونکړای شو

 لیکوال:محمدناصرحلیمي

مسلمانان ولې کار ونکړای شو

زه د مسلمانانو ناکامي د فرعي اختلافاتو پاروونکو او د استبدادي نظامونو واکمنانو او پلویانو ته منسوبوم او هغو ته چې د تاریخ په اوږدو کې په ګڼو میتودونو سره یې مسلمان او مسلمانه یې له علم څخه لری ساتلی.

پر اسلامي هېوادونو داسې هوسي واکمنان وتپل شول چې ملي پانګه يې شخصي کړې او داسې پوهان راغلل، چې د اسلام دين يې په کتابونو کې بندي کړ، ولسونه، وړتياوې او ارزښتونه يې ښکېل او له خپلو هوسونو ځار کړل.

د سفاکو واکمنانو په لمسون په مذهبي اختلافاتو کې د اسلامي نړۍ ښکېلېدل وو، چې د مؤمنو ولسونو د پرمختیا مخې ته لوی خنډ او د نتایجو د ځنډ لوی لامل شو.

پورته عواملو له مسلمانانو دا فرصت واخست، چې په کايناتو کې د څېړنې له لارې د الله تعالی د قدرت نښې د"رحمة للعلمين" په توګه د حق پالنې او مسؤوليت اداينې په عملي قالب کې بشريت ته د خير په بڼه ورسوي، که دا علمي څېړنې د قرآن کریم په لارښوونه شوې واى نن به بشريت له دومره لويو ناورينونو سره نه واى مخ او انسانانو به زمکه ځان ته یو مجازي جنت ګرځولی وای.

ځينې بيا ساینسي علومو ته د خېټې علم وايي، په داسې حال کې چې په حلالو د خېټې مړول په اسلام کې تر عبادت ځکه مخکې دی چې د حرامخور عبادت نه قبليږي، د عزتمن اسلام عزتمن بار هغه عزتمن ولس پورته کولای او ځای ته رسولای شي، چې خپله خېټه او د ولس خېټه پخپله حلاله پانګه مړه کړي، څوک چې د هر چا خوري د همغه سندرې او باژې به غږوي، له کفر نه وروسته د اسلام ستر دښمن فقر دی، تر کفر هم د بدعملیو ستر لامل فقر دی.

اقبال څومره ښه وايي:

سر دین صدق مقال اکل حلال خلوت و جلوت تماشای جمال

 ساينسي علوم د قرآني آيتونو تحليلي شننه، تعليلي تفسير، تطبیقي څېړنه او عملي ارزونه ده.

یا په بله ژبه ساينسي علوم د قرآن کریم د آیتونو عملي او مشهود تفسير دى.

په دې اړه د استاد عبدالدائم الکحیل استاد محمد راتب النابلسي، استاد بخار، داکتر ذاکر نائيک سائنسي تحلیلونه واورئ، په اورېدو یې د انسان ايمان تازه کېږي.