د اجتماعي فساد نښې

 لیکوال:محمدناصرحلیمي

د اجتماعي فساد نښې

د هرې ټولنې عقلي کچه او عاطفي وضع چې معلوموې، مشران يې وګوره چې څومره عقلي وړتيا او عاطفي سپېڅلتيا لري. مفسدین اجتماعي جوړښتونه د قومي، مذهبي، ګوندي، ژبني، نژادي او توکمیزو توپیرونو، ړندو اختلافاتو او تعصباتو پر بنسټ جوړوي، په ګڼو نومونو يو پر بل ځپي او خپل واک غځوي او له رواني پلوه د واکمنۍ جنون چې پرې اخته دى، کاذب تسکين وربښي.

په دغسې ټولنو کې کنځلمار، ناندرېمار او درغلګر قیادتونه رامنځته کېږي، چې ولسونه پېړۍ پېړۍ د تشو خبرو په منتر او ساحرانه الفاظو په جنتر کې وږي، تږي ځپلي په نا امنيو او خپلو خولو کې ډوب ساتي.

قرآن د اجتماعي جوړښت لپاره انسانان ورونه ګڼي، تقوی او احسان یې د بروالي او ټيټوالي معیار دی، د خیر په چارو کې سره همکار او د شر په چارو کې به یو بل ته مخه نه ورکوي د عدالت پلي کول او د ظلم مخنيوی د هر انسان ایماني او وجداني دنده ده، د هر انسان په اړه عدالت فرض او ظلم حرام دى.

په دغسې ټولنه کې بیا عاقل، کاريګرو او سپېڅلو خلکو ته د مشرۍ چانس په لاس ورځي. بیا په دغسې ټولنه کې د لاس په صفایۍ او د ژبې په چالاکۍ څوک مشروټي نشي کولای، د مشروټانو بازار سړېږي، حلال مال خدمت او سړیتوب د لوړ والي او ټيټوالي معیار وي.