د قرآن عامېدنه او د ظلم ورکېدنه

 لیکوال:محمدناصرحلیمي

د قرآن عامېدنه او د ظلم ورکېدنه

کله هم چې قرآني لارښوونې د اکسجن غوندې په ټولنه کې عامې او ارزښتناکې شي، د ظلم تکتیکونه مات او بې اغېزې شي، ظالم په ټولنه کې غندلى او بې ملاتړه شي، د خلکو له خوا د ستاينې پر ځای له رټنې سره مخ شي، خپله یا له ظلم څخه لاس اخلي یا هغې ظالم پالې ټولنې ته ورځي، چې په ولسونو کې د ذلت کچه لوړه او د ده رنځور ضمير او د اندېښمنو اندونو لپاره لاس پړکوونکي ليکوال او ممبروال موجود وي.

په عامو خلکو کې د مهربانۍ، عزت او کرامت احساس هله راژوندی کېږي، چې عالم د ظالم په ملاتړ شرمېږي او په ضمير کې يې د ظلم اوظالم پر ضد د مقاومت عزم او د رټلو اراده پیاوړې کېږي.

قرآنپوه په ظالم کې د بل چا د مال خوړلو، شتمنۍ لوټلو، تروړنې، د خلکو د استعمار او استثمار روحیه او جرأت له منځه وړي همدا لامل دی، چې ظالمان د قرآني علم خپرېدل د ځان په زیان ګڼي.

قرآن د ظلم او ظالم حیثیت له زیان سره مخ کوي، چېرته چې قرآن کریم حاکم شي یا به ظالم له ظلمه توبه باسي یا به په ټولنه کې د یو بې ارزښته انسان په توګه دقانون په منګولو کې په زندان کې ژوند تېروي، قرآن ظالم د مال له زيان سره مخ کوي، د پردي مال خوړلو، لوټلو او یرغمل کولو اراده پکې ځپي او مخې ته يې قانوني خنډونه دروي د ملي شتمنیو د لوټلو او د خلکو د زبېښاک روحیه پکې ځپي په حقیقت کې قرآن کریم رحمة للعلمين دی ؛ خو ظالم کينه ګر، تېريګراو کبرجن وي، د ظالم انساني ذوق رنځور دی، پخپله ګټه کې خپل تاوان ګوري او تاوان ګټه ګڼي، قرآن د عامو وګړو لپاره رحمت او د ظلم د ټولو ډولونو د له منځه وړو لپاره عملي خوځښت او پايله وال سيستم لري ظالمانه سیستمونه له منځه وړي او پرځاى يې د عادلانه سیستمونو ريښې او طرحې مضبوطوي قرآن کریم ظلم، ظالم، د ظلم عوامل او د دوی درد ناکه پاى تر ۳۰۰ځلو زیات غندلي او رټلي دي.