د وحې حاملین او د الحاد رنځ

 لیکوال:محمدناصرحلیمي

د وحې حاملین او د الحاد رنځ

مګر د وحې حاملينو چې د دې رنځ په حکيمانه وقايه له عملي معالجې نه مخکې مکلف وو، څه کړي دي؟ وقايه ؛ خو چې د کاري تمبلۍ، سیاسي استبداد او څېړنیزې ناپوهۍ پر محور هر علت درلود ونشوه (!) په درملنه کې ولې پاتې راغلو!؟

د مسلمانانو د سقوط اساسي لامل د اسلام په تاریخ کې څېړنو ته د هڅوونکو آیتونو پرېښودل او د ذهینو انسانانو شاته غورځول وو تاریخونه لیکي چې ستر پوهان یا بندیان یا په عادي کارونو بوخت وو. ^[1]

يا په بله ژبه د مسلمانانو د سقوط اساسي لامل د بشري سرچينو او طبيعي زېرمو په اړه بې پروايي وه.

د تاريخ په لوستو داسې څه مخې ته نه راځي، چې د دې تاريخي جرم په اړه په تېرو پېړيو کې د برائت دلیل ولرو.

دا بايد ومنو چې په شلمه پېړۍ کې د مسلمانانو نظري، عملي او لیکنۍ ونډه د الحاد په تمبولو کې کافي نه ؛ خو د ستاينی وړ ده هغه هم د مظلومانو د وینو په سېلاب، د اوښکو پر رودونو او د مایوسو ملتونو پر آهونو، نه د علمي او عقلي فعالیت له لارې ؛ خو دلته یوه ستونزه ده، چې الحاد له استدلاله نه، له ديني فساده سرچينه اخلي په دې معنا چې کله هم دين د ټولګټې^[2]پر ځاى د فردي ګټو اجتماع ځپونکی محور شي ؛ خلک عقده اخلي بيا د کاذبو دينوالو پر ځاى پر ريښتني دين باندې ملنډې وهي داسې عقده یي کېږي، چې بيا د اسلام د حقانيت دلايلو د ګټورتيا شواهدو او د رښتینولۍ قرائنو ته هم نه ځير کېږي.

که موږ په میلیونونو دلایل د الحاد په رد او د توحید په تایید کې وليکو او ووايو، تر هغه بې اثره او خطرزېږه دي، چې دین ته منسوب خلک او د توحيد مخکښان د الهي او بشري حقونو ادايينې ته عملاً په منتجه بڼه ژمن نشي او د بشر په مادي او معنوي رغونه، ژغورنه او پرمختیاوو کې خپل مسؤولیت ادا نه کړي.

---

[1]. المحاورالخمس فی القران الکریم د محمد الغزالي شهکاره لیکنه ده په دې اړه حیرانوونکی عالمانه تحلیل لري.

[2]. اجتماعي ګټې او مصلحتونه.