قرآني خبرې معیارې خبرې

 لیکوال:محمدناصر حلیمي

قرآني خبرې معیارې خبرې

د پېغمبرانو خبرې اترې موږ ته خبرې اترې ښيي، موږ اړ یو چې په قرآن کریم د قرآن کریم شاګردان د قرآن کریم د خبرو اترو په اصولو وروزو. زه دا خبره په زغرده کوم چې کله هم د ژورنالېزم د نړېوال پوهنتون تر پروفیسوره د قرآن کریم د شاګرد خبرې خوږې، ګټورې، په زړه پورې او پرځای نه وي، مدرسه، نصاب، اداري او تدریسي تشکیل، ښوونیز او روزنیز وسایل په حقیقت کې د قرآن کریم د عظمت حق نه دې پېژندلی او نه دی ادا کړی. د استاد، شاګرد، تعليمي نصاب او د تعلیمي چاپېریال په اړه بیا باید کتنه وشي، نیمګړتیاوې په نښه او ‌‌‌تشه په مسلکي او تخصصي بڼه د باکفایته کاري ټیم له لارې ډکه شي.

که قرآن کریم تر نړيوالو پوهنتونونو په زړه پورې او ګټوره نتیجه ورنکړي، د قرآن کریم د اعجاز مفهوم زیانمنېږي او پړه به یې پر ښوونيزو او روزنيزو سيستمونو، ښوونکو او دیني عالمانو وي.

په نبوي احادیثو او قرآن کریم کې د کتابیانو او قرآن کریم لوستونکو ښه او بد ډولونه د دې لپاره یاد شوي دي، چې د ښو بېلګو د کچې د لوړولو لپاره کار وشي او له بدو هغو څخه خلک وژوغورل شي. هېڅکله هم پورته ډولونه د تور او پېغور لپاره نه دي یاد شوي.

یوسف (عليه السلام) له خپلو کینه کښو او رخګرو ورونو سره څه ډول له کینې، رخې او کرکې څخه پاکې (طیبې)خبرې وکړې؟ د هوس په لومو ښکېلې، د زر، زور او تزویر مستبدې ښایسته ښځې (زليخا) یوسف (عليه السلام) ته څه وویل او ده ورسره څه ډول د پت او درنښت (طیبې) خبرې وکړې؟ د بې انتظامه نظام لپاره يې په کومو ټولنیزو انسجام راوستونکو، اړتیا رژوونکو، وړتیا پنځوونکو، عدالت ځواکمنوونکو (طیبو الفاظو) سره، څه ډول طیب نظام رامنځته کړ او د ژوندانه په لوړو ژورو ترخو او خوږو حالاتو کې يې څه ډول طیبې خبرې وکړې؟