د عزت کړنلار

 لیکوال:محمدناصر حلیمي

د عزت کړنلار

د یوسف غوندې عزتمن ځوانان باید وروزو، چې په ښکليو ماڼيو کې د زنا تر ذلت د زندان تورتمونه غوره وګڼي. د کسات پر ځاي د بښنې له لارې ځان او غليم ته عزت وبښي. د ملت حیثیت له رندانو او مال له لوټمارو څخه وژغوري او د سپېڅلو پوهانو له لارې ورته د عادلانه وېش مخه برابره کړي چې عام خلک د لوږې او بېوزلۍ د ذلت په دام کې ښکېل نه شي.

د موسی علیه السلام غوندې د عزت احساس پیدا کړي چې د فرعون غوندې قاتل وېره هم په زړه کې و نه لري، د موسی علیه السلام مور چې د تربیت کوم عزتمن مراحل تېر کړل، همغه مراحل باید د باکيفيته نسلونو د ايجاد لپاره تېر کړو. د موسی علیه السلام له عزتمنو چارو سره یې اصلي ریښه چې مور يې یادېږي.

دې ته موږ ځیروي، چې عزتمنه مورولي رامنځته کول د عزتمنو قیادتونو د رامنځته کولو بنسټ عزتمنه او عالمانه مورولي ده، تر هغه چې مورولي عزتمنه نه شي، ټولنې د رښتينې عزتمندۍ ساه هم نشي اخېستى.

د پېغمبرانو د تربیت پړاوونه په علمي توګه ولوستل شي او له تومنې (نطفې) نه تر ځوانۍ پورې چې کوم روزنیز پړاوونه پرې تېر شوي، هغه پړاوونه باید د باکیفیته نسل د ایجاد لپاره ووهو.

د ماشومانو وهل او رټل قانوني جرم وګڼل شي، عاملین باید شدید مجازات او د محکمې لخوا په بند محکوم او د ځانګړې سزا د ټاکلو لپاره باید قوانین تطبیق شي، ځکه په وهلو سره ماشوم د سپکاوي احساس کوي. د مریېنې روحيه پکې وده کوي. د غلامۍ په احساس روږدي خلک که څومره هم دین زده کړي، بیا هم د آسماني احکامو له تطبیقه تښتي ؛ ځکه چې د قرآني آیتونو پلي کول د هوس، ړندو احساساتو، خلکو او نفسي غوښتنو له غلامۍ څخه په ازادۍ سرته رسېږي، نه په مرییتوب.