طبیعي څېړنه او لابراتوار د اسلام مدافع وکیلان

 لیکوال:محمدناصرحلیمي

طبیعي څېړنه او لابراتوار د اسلام مدافع وکیلان

کله ناکله له ځان سره وایم، که علمي څېړنو او لابراتوارونو د اسلامي احکامو حکمتونه او ګټې نه وای ثابتې کړای او د مسلمانانو نیمګړی دعوتي جريان او احساس هم همدومره تت او ټیټ وای، بشر به څومره ذلیل وای!؟

د اسلام روښانه او لمر مخۍ رڼه او خوږه څېره به لا په څومره تورو او خړو وريځو کې پټه واى انساني عقلونه او عاطفې وګړي او ټولنې به لا څومره مظلومې واى.

د الله تعالی په لايتناهي نعمتونو کې قرآن، علمي څېړنو، د بشري منابعو او طبيعي زېرمو پرمختيا ته ډېر خوښ يم. بشریت اسلام منلی که نه دی، خو فردي او اجتماعي ژوند یې د اسلام په خوږو وږمو خوږ بویه او ښایسته ګلانو ګاڼل شوی دی، بې له استثنا هر بشر په هغه څه کړېږي، چې د اسلام له حکمونو سره ټکر لري او د هغه کاروبار له خوږو خوند اخلي چې اسلام امر کړی.

انساني مسؤولیتونو او ارزښتونو ته په پام چې څومره انسانپاله، ایمانپاله، نړېپاله عنوانونه دي، له قرآني او نبوي پانګې څخه اخستل شوي دي.

غربي پوهان خو خپله په دې اعتراف کوي، چې که اسلام نه وای، بشري پرمختیاوې به زرګونه کاله شاته پاتې وای.

خو زه د زرګونو دلايلو له مخې: وايم که اسلام نه واى، بشري پرمختياوې نه رامنځته کېدې.